تسويق إلكتروني, ريادة أعمال

من كتب ويكيبيديا: كيف غير تواجدنا على الإنترنت كل ماله علاقة بالبزنس

قد عمرك جربت تكتب مقالة أو تعدل على مقالة في ويكبيديا؟ أي حد في العالم يقدر يكتب مقال على ويكبيديا أو يعدل على مقال .. كل اللي  تحتاجه إنك تفتح حساب وتكتب وتنتظر 24 عشان يظهر اللي كتبته..

منطقياً هذي العملية ممكن انها تكون مش أنسب طريقة عشان تعمل موسوعة شاملة .. بالنهاية مش أي حد يقدر يكتب شي ويكون مرجع وان الصح إننا نوظف عدد كبير من الكتاب المتخصصين اللي نقدر نثق فيهم ونخليهم هم يفعلوا لنا نوسوعة .. بس الواقع يقول لنا إن افتراضنا غلط .. وان الطريقة أوجدت لنا ويكبيديا اللي كلما نعتبرها أحد أهم مصادر معلوماتنا والطريقة الثانية أوجدت لنا Encarta اللي مايكروسوفت صرفت عليها ملايين الدولارات والآن مش متأكدة لو في كثير مننا لا زالوا يذكروها

لازلت أتذكر في بداية عملي كمبرمجة الإندهاش اللي أصابني لما عرفت إن منتج مثل الويب سيرفر مفتوح المصدرApache    هو مش مملوك لجهة وان الناس من كل العالم يحق بها انها تتزله وتعدل عليه وترجع ترفعه عشان يكون متاح مرة ثانية لكل الناس .. ولغاية هذي اللحظة لازلت مندهشة من الطريقة اللي يتم بها التنظيم الذاتي هذي العملية واللي خلت أباتشي وويكبيديا ومنتجات كثيرة مفتوحة المصدر تكون منافسة لمنتجات رقمية ينتجها موظفين هذه هي وظيفتهم في الحياة وياخذو فلوس عشان يطوروا منتجات شبيهة..

في الوقت اللي يتجمع فيها العديد من البشر على الإنترنت واللي لايجمعهم أي شئ .. لا لغة ولا بلد ولا جهة توظيف وفي حالات كثير لا توجد جهة معينة لتنظيمهم ومع ذلك يخلقوا تقنيات ومنتجات غاية في الفعالية .. ودائماً ما كنت أتساءل لماذا؟ وأيش اللي يستفيدوه وكيف يتم التنظيم ..

في يونيو 1998 صعقت IBM   المجتمع التقني لما  أعلنت توقف جهودها التطويرية على سيرفر الويب الخاص بها تماماً ودعمها التجاري لأباتشي وانضمامها لعملية تطوير وتحسين أباتشي ويب سيرفر المفتوح والمجاني .. كون شركة عملاقة بحجم IBM توقف تطوير منتجها المدفوع وتعترف بقوة وفعالية منتج مجاني ومفتوح هذا اعتراف صريح بإن الحشود الإلكترونية ممكن تكون بديل أفضل في مواضع كثيرة..

على الرغم من العدد المتزايد من قصص النجاح اللي تم فيها استخدام الحشود الإلكترونية . نلاقي إن القليل جداً من المؤسسات هي اللي تستخدم هذا المورد المتاح (والمجاني في أحيان كثيرة) بفعالية..

تفتكروا أيش اللي يمنع الشركات والمؤسسات انها تستفيد من الحشود الإلكترونية .. وقبل كذا أيش اللي يحفز الحشود الإلكترونية لصنع وتطوير هذي المنتجات من الأساس .. أحب أسمع منكم في التعليقات ..

تسويق إلكتروني, ريادة أعمال, عمل مستقل

قوة الجمهور الرقمي – threadless.com

في وقتنا الحالي ومع العولمة وتحرير التجارة وثورة الاتصالات تقريباً أصبح أسهل شي إنك تحصل على منتجات من أي بلد تريده وبالجودة والسعر اللي تريده وهذا الشي خلى دخول منافسين جدد في أي مجال يكون تحدي .. لأنه في النهاية أيش ممكن تقدم جديد وكيف ممكن تنافس عمالقة التجارة ولو من ناحية الأسعار كيف ممكن تنافس المنتجات الصينية اللي جودتها وأسعارها معروفة للكل ..
وبناءً على هذي المعطيات بدأت الشركات الناشئة باتخاذ اجراءات مختلفة منها الاعتماد على تخصيص المنتجات بحسب الزبون أوالسوق بحيث يكون من الصعب على الشركات الكبيرة انها تسوي منتج مفصل لكل زبون أو سوق على حدة أو غيرها من الاستراتيجيات ..

واحدة من الاستراتيجيات الأخاذة بالنسبة لي هي استراتيجية إشراك الجمهور الرقمي في عمليات تصميم المنتج سواءً في عمليات التصميم  Threadless.com نفسها أو في عمليات اختيار التصميم الأنسب .. واحدة من الأمثلة هي شركة
وهي شركة تنتج و تبيع ملبوسات وبالأخص تيشيرتات .. بس هذي الشركة ما تصممش تيشيرتاتها بنفسها .. الشركة تتيح المجال للمصممين الموهوبين لرفع تصاميمهم على موقعها ويقوم الجمهور بالتصويت للتصاميم .. والتصاميم الفائزة يتم طباعتها على التيشيرتات ويطبع اسم الفائز جنب ليبل الشركة على التيشيرت من الداخل غير انه صاحب التصميم الفائز يحصل على مكافأة مالية غير الربح عن كل قطعة تنباع من تصميمه وغير كوبونات الهدايا من threadless بكذا نكون خلقنا  win-win situation المصممين أتيحت لهم الفرصة للعمل بشكل حر والحصول على الشهرة وعائد مادي والشركة اتيح لها الوصول لعدد لانهائي من التصاميم ومش كذا بس .. كمان أصبح عندها تصور للتصاميم اللي ممكن تكون أكثر رواج من قبل حتى ما ينطبع التيشيرت وينزل السوق .. غير التجربة الفريدة اللي تتاح للمستهلكين واللي يعطي للشركة فرص أكبر في خلق عملاء ولاءهم عالي ..

هذي واحدة من الحالات اللي باناقشها في كتابي عن قوة الجمهور الرقمي واللي بيصدر بإذن الله في 3 مايو 2018 ..
وهذي بعض صور التصميمات اللي حبيتها (وأخيراً صار معايا عذر أتفرج على منتجات بدون ما أحس بالذنب انني ضيعت وقتي)

 

ريادة أعمال

مسابقة MIT للشركات العربية الناشئة

سلام أعزائي ،،

أمس الاثنين حضرت فعالية التعربف بمسابقة  MIT للشركات الناشئة واللي كانت في حاضنة الأعمال بلوك ون..

C360_2017-10-17-11-41-18-817

الجلسة تضمنت التعريف بالمسابقة نفسها وبالمسارات الثلاثة اللي ممكن تقدم فيها .. وهم : مسار الأفكار مسار الشركات الناشئة  ومسار الريادة الاجتماعية .. والتعريف بالشروط و بالجوائز المالية المقدمة للفائزين والدعم والتدريب اللي بيحصلو عليه ويتضمن  التدريب على ريادة الأعمال والإرشاد والدعم بالإضافة للتغطية الإعلامية عن طريق أهم المنصات الإعلامية المعنية بريادة الأعمال زي: ArabNet, Entrepreneur, Cision, Wamda ..
من خلال اللي سمعته أمس ماكانش في اختلاف كبير بين اللي مذكور في الموقع الرسمي لهم واللي انقال في الجلسة أمس
(موقع مسابقة الشركات العربية الناشئة) الموقع جدا واضح والمعلومات فيه متسلسلة وسهل الوصول إليها.. فاللي مهتم بالمسابقة ممكن يزوره ويقدم بسهولة .. وفي حال وجود أي أسئلة واستفسارات ممكن تتواصلو مع فريق المسابقة على أي من هذي الوسائل اللي في الصورة الجاية:
C360_2017-10-17-11-40-37-401

أني متابعة للمسابقة من زمان بس هذي أول سنة باقدم فيها .. وحتى لو ما انقبلت هي السنة باظل أقدم فيها لأنها واحدة من أهم  الفرص العربية من وجهة نظري .. حتى لو ماكنش في جوائز مادية يكفي الإرشاد والتدريب على أيدي نخبة عالم الأعمال العربي غير التغطية الإعلامية الكبيرة والثقة اللي جاية من اسم MIT أهم معهد تكنولوجيا في العالم ..

هذي مش أول مسابقة أقدم عليها هذي السنة وما أقلكمش كم فرقت عملية التقديم لوحدها على فهمي وإلمامي بفكرة شغلي .. اضطراري انه أشرح فكرتي أكثر من مرة لأكثر من جهة وبأكثر من فورم خلى الفكرة تتضح لي كل مرة أكثر وأفهم الجوانب المختلفة لتطبيقها وزاد ثقتي بها وبنفسي كمان ^^ .. فأنصحكم جميعا لو عندكم مشروع تقدمو على كل الفرص المتاحة حتى لو مافيش مجال انك تفوز بالفرصة من اول مرة .. التقديم لوحده تجربة تستاهل تخوضها ..

 اللي أحب أضيفه بس هو شكر لأربع صفحات/ مشاريع ع الفيسبوك من خلالهم أبقى دائما على اطلاع بالمسابقات والفرص المتاحة لليمنيين

  1. صفحة حاضنة الأعمال بلوك ون (واللي هي الشريك الاجتماعي لمسابقة MIT)
    10256569_1410821312521550_8808250048443236478_o
  2. صفحة Innovative Yemen
    21231658_1918760918373115_1860742223171878252_n
  3. صفحة Yemen Events
    12474077_523237924521963_8473489408689799405_o
  4. مجموعة فرص شبابية
    22279432_1512889358790745_6141565763407702648_n

دعواتكم أتقبل هذي السنة .. ولو فزت لكم الحلاوة ^_^

تسويق إلكتروني, ريادة أعمال

تأثير السوشال ميديا على الأعمال التجارية

سلام أعزائي ..

في تدوينة االيوم حبيت أتكلم عن تأثير السوشال ميديا على الأعمال التجارية وأستعرض معاكم شوية نقاط من التقرير الصادر عن    قمة رواد التواصل الاجتماعي العرب (التقريرقديم شوية من 2015) وشوية أرقام من التقرير الصادر عن شركة يمن آيكون سنة 2016 .. وكمان كم إنفوجراف مقتبسين من هذا المقال ونشوف كيف ممكن هذي المعلومات تفيدنا في استخدام السوشال ميديا بطريقة مؤثرة ومفيدة لأعمالنا التجارية ..

المنصات الأكثر استخداماً

بحسب تقرير قمة رواد التواصل فإن الفيسبوك والواتس آب هم المنصتين الأكثر استخداماً في العالم العربي بشكل عام .. وفي اليمن نفس الشي طبعاً .. وكانت نسبة الاستخدام للمنصات المختلفة كالتالي: (اتفاجأت من نسبة مستخدمي جوجل بلس)

yemen_platforms

وبحسب تقرير يمن آيكون فإن عدد مستخدمي الفيسبوك أكثر من 2 مليون .. منهم مليون ونص إلى 2 مليون مستخدم نشط شهرياً (رقم كبير بالنسبة لي) وموزعين ديموجرافياً وجغرافياً كالتالي:

yemen_fb

هذي الأرقام مش مجرد أرقام والسلام .. هذي الأرقام هي عبارة عن فرصة تسويقية منخفضة التكلفة ودقيقة وعميقة الأثر لو عرفنا نستثمرها صح ..

الدوافع الرئيسية لاستخدام وسائل التواصل الاجتماعي في الأعمال التجارية

بحسب تقرير قمة رواد التواصل فإن دوافع استخدام السوشال ميديا تتلخص فيما يلي:

  1. نمو الأعمال التجارية
  2. تحسين صورة الشركة / العلامة التجارية
  3. استخدام وسائل التواصل الاجتماعي كأداة للتسويق
  4. فرص العمل/ البحث عن المواهب
  5. التركيز أكثر على العملاء
  6. تدريب الموظفين
  7. تحسين العلاقات داخل المكتب
  8. تحسين العمليات المتعلقة بالخدمة
  9. تحفيز ريادة الأعمال
  10. الابتكارات والتقنيات الحديثة
  11. العولمة
  12. ارتفاع الإنفاق على التسويق والإعلانات

سلبيات السوشال ميديا على الأعمال التجارية

  1.  خطر تشـويه الاسم التجاري للشركات
  2. تشكل وسائل التواصل الاجتماعي تهديداً لـوسائل الإعلام التقليدية مـن خلال استحواذها على حـصص مـن أسـواقها

نصائح لاستخدام المنصات الأشهر بشكل فعال 

طبعاً استخدام وسائل التسويق المختلفة لازم يكون ضمن خطة تسويقية محكمة تتتناها الشركة .. لكن نقدر نستعرض أفضل .الممارسات لعمل منشور مثالي. وتختلف هذي الممارسات باختلاف المنصة المستخدمة

فيسبوك

1

يوتيوب

3

إنستجرام

2

ختاماً

أتمنى لكل الأعمال التجارية أياً كان حجمها في اليمن إتها تدرك حجم الفرصة  اللي تتيحها السوشال ميديا وانها تبدأ تفكر تتعامل بجدية أكثر وباحترافية أكثر مع هذه الوسائل لأن هذا الشي في النهاية بعود لمصلحتها هي قبل أي شي ثاني ..

 

عمل مستقل

ماهو العمل الحر/ المستقل أو الفريلانس؟

سلام أعزائي، رجعت لكم بعد إجازة طويلة حبتين من التدوين ..
زيما كلمتكم من قبل منشغلة بفكرة العمل الحر على الإنترنت .. وكلما أقابل حد اسأله عن نظرته لهذي الطريقة في العمل وهل ممكن تكون الحل حاليا للبطالة في اليمن والا لأ؟ وتفاجأت انه في ناس كثير أقابلهم في بلادنا ماقد سمعوش عن مصطلح الفريلانس
أو ماهمش على دراية كاملة به فقررت أخلي هذي التدوينة عن العمل الحر (فريلانس) ..

طيب .. من هو العامل المستقل أو الفريلانسر؟
هو شخص يعمل لحسابه الخاص، وغير ملتزم لرب عمل واحد. يعني قد يشتغل الفريلانسر لعدة عملاء أو شركات في نفس الوقت.

ميزات هذي الطريقة هي:
1. انت مدير نفسك.
2. ربح أكبر.
3. غالبا ماعليكش ضرائب دخل.
4. تقدر توازن بين عملك وحياتك بشكل أفضل.
5. هذي الطريقة تخليك أكثر سعادة وصحة.

عيوبها:
1. لاتتمتع بالأمان الوظيفي.
2. عملك غير دائم.
3. لا تتمتع بالفوائد الإضافية للوظيفة زي: (التأمين الاجتماعي ، التأمين الصحي، البدلات …الخ)
4. عليك إدارة الحسابات بنفسك.
5. تتحمل مخاطرة إن الزبون أحياناً قد مايحاسبك.
6. يجب عليك أن تتحمل مسؤولية تحفيز نفسك على إنجاز عملك.

مكان عملك :
تقدر تجلس في أي مكان يناسبك .. سواء فوق سفرة بيتكم أو تحول غرفة في منزلك لمكتب أو حتى تجلس في أي كوفي شوب .. المهم ان تتأكد أن المكان اللي انت جالس فيه يتاسب احتياجاتك وخالي من الإزعاج أو من أي شي ممكن يشتت انتباهك.

سويلك معرض أعمال (portfolio)

وخلي التالي في بالك:

– خلي أعمالك فيها تنوع واحرص على إنك تظهر هذا الشي.
– إرفق رقمك وإيميلك عشان تسهل على الزباين عملية الاتصال بك.
– انشر فقط الأعمال اللتي تفخر بعرضها.

فين ألاقي هذه الأعمال :
– في منصات العمل الحر على الانترنت.
– انضم لأعمال تطوعية وأندية ومجموعات.
– استغل قائمة معارفك، كل فرص التشبيك والتعرف على ناس، واستغل كل فرصة متاحة لك للإعلان عن نفسك.

أهم النصائح للعمل مع عملاءك:
– حاول تتأكد انك أنت وهم متفاهمين وعلى نفس الصفحة.
– سوي عقد، سوي عقد، سوي عقد.
– احرص على التواصل معهم بشكل دائم.
– خليك مرن، بس مش زيادة عن اللزوم.

نصائح عامة:
– لا تنامش النهار بطوله.
– احتفظ بالفواتير والإيصالات.
– خبي مبلغ للطوارئ.
– مش معنى انك تشتغل من البيت انك تشتغل 24 ساعة 7 أيام في الأسبوع.
– مش عيب انك توكل غيرك ببعض المهام اللي ماتقدرش عليها.
– انتبه لصحتك .
– مش لازم توافق على كل الأشغال اللي تجي لك.

وبس .. هذا اللي في بالي حاليا.. متأكدة انه باستمر في الكتاية عت العمل الحر.. لأنني مقتنعة انه هو الحل يمكن الوحيد للبطالة الرهيبة في اليمن خاصة في مجال تقنية المعلومات.

 كتبت الكلام السابق في إنفوجراف عشان يسهل عليكم حفظه ومشاركته. شاركوه ولاتبخلو على غيركم بالمعلومة ^_^

freelancer

عمل مستقل

العمل عن طريق الإنترنت “مقابلة”

 

سلااااام أعزائي .. اليوم مابترجمش مقال .. اليوم حابة أشارك معاكم قصة نجاح لشاب مستقل (فريلانسر) يشتغل على منصة أبوورك upwork
وعدة منصات أخرى .. عبدالله تعرفت عليه عن طريق مجموعة ع الفيسبوك أسسها هو ويشارك عبرها تجربته في العمل
أونلاين.. بالنسبة لي أي مستقل (فريلانسر) بمجرد إنه اشتغل ولو عمل واحد وكمله واستلم مردوده أعتبره قصة نجاح .. فهو بالنسبة لي فتح الباب والباقي كله بيجي بالاستمرارية والمثابرة .. والا كيف تشوفو انتو ؟
عموماً نبدأ بالأسئلة واللي حبيت يكونو قليلين وعمليين عشان تقرأوهم وبإذن الله تستفيدو منهم ..
بروفايل الأخ عبدالله عيسى على أبوورك وفيه المعلومات والمهارات الأساسية

https://www.upwork.com/fl/tanmessa

abd_profile

فبنقفز من فوق التعريف ونتجه على طول للأسئلة العملية

1. أخ عبدالله غير أبوورك ايش هم المنصات اللي عملت عليهم؟
وليش اخترت أبوورك وركزت عليها ؟
هلا ايمان
اشتغلت في موقع مستقل
–  وموقع fiverr.com
والان بدأت في موقع peopleperhour.com
– بالنسبه للشق الثاني من السؤال ..
انا لم اختره عن غيره فانا اشتغل تقريبا في معظم مواقع العمل عن طريق الانترنت ولكل موقع ميزاته وسلبياته.
بالنسبه للابوررك ركزت عليه لان فيه اعمال كثيره وتشعري فيه براحه اكثر وايضا يعطوك تقريبا ٣٠ فرصه مجانيه شهريا للتقديم على الاعمال اللي ترى انك خبير فيها في حين ان غيره من المواقع تقدم لك فرص اقل. ايضا وفرة الطلبات من قبل العملاء والتي قد تزيد من
فرصة حصولك على دخل اكثر اذا كانت خبير في مهارتك وتخصصك

2.ايش هي المشاكل اللي تواجهها في العمل أونلاين بشكل عام؟
– مواكبة التطور الرهيب في عالم التطوير والبرمجه وايضا متطلبات سوق العمل.
– تنظيم الوقت بين العمل والاسره وبقية التزاماتك الاجتماعيه
– معرفة الصادق من الكاذب او معرفة الجاد من المحتال
– الظروف اللي طرأت علينا منذ سنتين (انفطاع الكهرباء والانترنت وغيرها من الظروف المعيشيه الصعبه التي يواجهها كل اليمنيين).
– سحب المبالغ التي نتقاضاها من مواقع العمل عن طريق الانترنت

3.كم جلست على ما جى لك أول عرض عمل أونلاين ؟
– يختلف من موقع الى اخر ولكن على كل مطور او مطوره ان يتحلى بالصبر والمثابره والا ييأس حتى لو حاول سنه كامله.

4.طيب، معروف انه مافيش سحب من الباي بال فكيف تسوي لما تستلم مستحقاتك؟
– ذكرت ان هذه النقطه هي احدى الصعوبات اللي بنواجهها في اليمن ولكن استطعت حلها عن طريق شبكة الاصدقاء المنتشرين في انحاء العالم .. يقومون باستلامها ومن ثم تحويلها الى اليمن. السلبيه الوحيده في هذه الطريقه ان المبلغ يصل اليك منقوص وتخسر فيه مبلغ
كنا نتمنى ان نحتفظ به لانفسنا لان فيه رسوم سحب المبلغ من الموقع الى حسابك ومن ثم فارق سعر الصرف اذا كانت البلد اللي سيتم سحب المبلغ منه لا تقبل الدولار وايضا رسوم التحويل من هذا البلد الى اليمن. اتمنى على من يعرف طريقه اخرى مجربه ان ينورنا بها وله الف شكر.

5.برأيك ليش الشباب اليمني عازف عن هذي الطريقة في العمل؟
– الظروف والبنيه التحتيه تعتبر من وجهة نظري اكبر عائق للشباب اليمني والذي بدوره ادى الى ابتعاد الشباب عن العمل عن طريق الانترنت.
– يوجد كثير من الشباب المؤهلين غير مطلعين على هذا النوع من الاعمال وعليه ارجو من الشباب ان يروجوا لها وان ينشروها في اوساطهم لانها بحق تعتبر حل بديل للبطاله اللي نعيشها

6.ممكن تكلمنا عن جروب الفيسبوك ؟ فكرته وليش أسستوه وايش ناويين تشاركو فيه؟
– المجموعه تم انشاءها لتوعية الشباب بشيء اسمه العمل عن طريق الانترنت وتستهدف تحديدا العاطلين عن العمل
– كنت ولازلت اتمنى ان يتم انشاء شركات (وهميه كخطوه اولى) والانطلاق للعمل في مواقع العمل عن طريق الانترنت
– ايضا يوجد حلم كبير لارلت متحفظ عليه ولم اشاركه بعد حتى اجد البيئه والاشخاص المناسبين.

7.أخيراً ، أيش أهم النصائح اللي تحب تقدمها للفريلانسرز اللي حابين يتجهو للعمل أونلاين؟
– انا من يحتاج النصح في حقيقة الامر ولكن بامكاني ان اشير على الشباب بالتالي
– كن خبير وصاحب تجربه في المهاره اللي تضع على بروفايلك
– تعلم كل يوم شيء جديد في تخصصك ومهارتك
– اهتم بمظهرك وبروفايلك وطريقة تواصلك مع الناس
– اهتم بلغتك الانجليزيه وطور منها قدر الامكان لانها شيء اساسي جدا

  وبكذا تكون انتهت المقابلة .. أتمنى إتكم تكونو استفدتو من النصايح اللي قدمها عبدالله زيما استفدت أنا.. تعرفو حد يشتغل أونلاين منشنوه وخلوه يشارك تجربته معانا ^_^

Featured Image Designed by Freepik

ريادة أعمال

5 مهارات تجعل من الأمهات رائدات أعمال رائعات

سلام .. المقال اللي ترجمته اليوم لاقيته واني في حالة شك هل باقدر أكمل والا لأ فدورت على شي يرفع معنوياتي .. وفعلا مافيش شي يأكد لي كم انا قوية أكثر من كوني أم .. لكل وحدة عندها أطفال وفي نفس الوقت تأسس لعمل خاص أبشرو .. انتو من أكثر الناس اللي عندهم المهارات المطلوبة للريادة 😊

المقال مترجم بتصرف من:
5 reasons moms make great entrepreneurs


الأمومة وتأسيس بزنس مش مختلفين بالقدر اللي تتصوروه .. فيما يلي 5 مهارات طورتها كل أم خلال رحلة أمومتها وتساعدها في انها تبدأ عملها الخاص:

1- العمل تحت الضغط

أجا وقت مغادرة المنزل ووابنك اللي عنده 5 سنوات مش لاقي تي شيرته المفضل ورافض يتحرك بدونه فاضطريتي تدوريه معاه، في نفس الوقت رضيعك بدأ يصيح من العرفة الثانية .. خلاص انتي تأكدتي انك باتتأخري على الاجتماع فتيجي باترسلي رسالة لمديرك تقومي تلاقي رسالة من جليسة الأطفال تقلك انها مريضة اليوم ومش قادرة تجي ! بتتفاجأي كم يشبه هذا الموقف المواقف اللي تواجهيها عند إدارة شركتك الخاصة.

2- مهارات التفاوض

تحاولي بجهد انك تبيعي حل لزبون محتمل أو تتفاوضي على صفقة؟؟ جربي تتفاوضي مع طفل عنيد وعمره 5 سنوات إنه ياكل صحن الخضار تبعه! صدقيني، إذا عندك أطفال فأنتي بالأساس قد طورتي مهارات التفاوض عندك 😊

3- الابتكار والقدرة على حث الآخرين على تقديم الخدمات

كرائدة أعمال بموارد مالية بسيطة ، القدرة على الخروج باستراتيجيات مبتكرة، والاستفادة من علم الآخرين وعلاقاتهم ومواردهم المتنوعة هو شئ حتمي ولابد منه. كأم ، أنتي متعودة على طلب المساعدة والنصيحة من الأهل والأصدقاء وحتى الغرباء، وغالباً تحصلي عليها.

4- تنحية الأنا (الإيجو) جانبا

كشخص يدير عائلة، أنتي تعرفي انه التصرف بذكاء لايعني إنك تكوني دائماً انتي الصح. في مرات يكون الفوز في جدال معين هو الصح ومرات يكون الأفضل إنك تفدمي مصالحك بعيدة المدى. وضع الأنا أو الإيجو على جنب خلال إدارة عملك هو شئ لا بد منهغشان تضمني بقاء الآخرين في صفك.

5- توقع الصعود والهبوط

معظم الرياديين يوصفو رحلة الريادة على إنها زي قطار الملاهي .. أو “زي المراجيح .. حبة فوق .. وحبة تحت”. في الوقت اللي يمكن لأي رائد أعمال إنه يستسلم ويرمي كل شي ورا ظهره .. مش ممكن للأم انها ترمي أولادها. في يوم بتلاقيكي طايرة من حبهم وهم مروحين لك بكرت سووه لك مخصوص في المدرسة .. وفي يوم ثاني بتتمني تاكليهم بعدما قلبو لك البيت فوق تحت قبل دقيقتين من زيارة حماتك 😭 . فطبيعي انك كأم تكوني قد طورتي مهارة التكيف مع الطلعات والنزلات مع الوقت.

إذا كنتي راغبة في بدأ رحلتك الخاصة في عالم العمل الحر وكنتي متخوفة من ان أمومتك بتكون عائق . تذكري كيف يمكن للمهارات اللي طورتيها كأم إنها تعينك في هذي الرحلة ..