قد عمرك جربت تكتب مقالة أو تعدل على مقالة في ويكبيديا؟ أي حد في العالم يقدر يكتب مقال على ويكبيديا أو يعدل على مقال .. كل اللي تحتاجه إنك تفتح حساب وتكتب وتنتظر 24 عشان يظهر اللي كتبته..
منطقياً هذي العملية ممكن انها تكون مش أنسب طريقة عشان تعمل موسوعة شاملة .. بالنهاية مش أي حد يقدر يكتب شي ويكون مرجع وان الصح إننا نوظف عدد كبير من الكتاب المتخصصين اللي نقدر نثق فيهم ونخليهم هم يفعلوا لنا نوسوعة .. بس الواقع يقول لنا إن افتراضنا غلط .. وان الطريقة أوجدت لنا ويكبيديا اللي كلما نعتبرها أحد أهم مصادر معلوماتنا والطريقة الثانية أوجدت لنا Encarta اللي مايكروسوفت صرفت عليها ملايين الدولارات والآن مش متأكدة لو في كثير مننا لا زالوا يذكروها
لازلت أتذكر في بداية عملي كمبرمجة الإندهاش اللي أصابني لما عرفت إن منتج مثل الويب سيرفر مفتوح المصدرApache هو مش مملوك لجهة وان الناس من كل العالم يحق بها انها تتزله وتعدل عليه وترجع ترفعه عشان يكون متاح مرة ثانية لكل الناس .. ولغاية هذي اللحظة لازلت مندهشة من الطريقة اللي يتم بها التنظيم الذاتي هذي العملية واللي خلت أباتشي وويكبيديا ومنتجات كثيرة مفتوحة المصدر تكون منافسة لمنتجات رقمية ينتجها موظفين هذه هي وظيفتهم في الحياة وياخذو فلوس عشان يطوروا منتجات شبيهة..
في الوقت اللي يتجمع فيها العديد من البشر على الإنترنت واللي لايجمعهم أي شئ .. لا لغة ولا بلد ولا جهة توظيف وفي حالات كثير لا توجد جهة معينة لتنظيمهم ومع ذلك يخلقوا تقنيات ومنتجات غاية في الفعالية .. ودائماً ما كنت أتساءل لماذا؟ وأيش اللي يستفيدوه وكيف يتم التنظيم ..
في يونيو 1998 صعقت IBM المجتمع التقني لما أعلنت توقف جهودها التطويرية على سيرفر الويب الخاص بها تماماً ودعمها التجاري لأباتشي وانضمامها لعملية تطوير وتحسين أباتشي ويب سيرفر المفتوح والمجاني .. كون شركة عملاقة بحجم IBM توقف تطوير منتجها المدفوع وتعترف بقوة وفعالية منتج مجاني ومفتوح هذا اعتراف صريح بإن الحشود الإلكترونية ممكن تكون بديل أفضل في مواضع كثيرة..
على الرغم من العدد المتزايد من قصص النجاح اللي تم فيها استخدام الحشود الإلكترونية . نلاقي إن القليل جداً من المؤسسات هي اللي تستخدم هذا المورد المتاح (والمجاني في أحيان كثيرة) بفعالية..
تفتكروا أيش اللي يمنع الشركات والمؤسسات انها تستفيد من الحشود الإلكترونية .. وقبل كذا أيش اللي يحفز الحشود الإلكترونية لصنع وتطوير هذي المنتجات من الأساس .. أحب أسمع منكم في التعليقات ..